ਕਿਤੇ ਭੂਤ-ਪ੍ਰੇਤ ਬੋਲਦੇ ਹਨ
ਕਿਤੇ ਧੜ ਉੱਠਦੇ ਹਨ,
ਕਿਤੇ ਬੈਤਾਲ ਬੀਰ ਨੱਚ ਰਹੇ ਹਨ
ਅਤੇ ਕਿਤੇ ਡਾਕਣੀਆਂ ਅੱਗ ਉਗਲ ਰਹੀਆਂ ਹਨ ॥੭੮੧॥
ਸੂਰਮੇ ਰਣ-ਭੂਮੀ ਵਿੱਚ ਜ਼ਖ਼ਮ ਖਾ ਰਹੇ ਹਨ,
ਸਾਰੇ ਕੱਪੜੇ ਲਹੂ ਨਾਲ ਭਿੱਜ ਗਏ ਹਨ,
ਇਕ ਸੂਰਮੇ (ਰਣ ਵਿੱਚੋਂ) ਭੱਜੇ ਜਾਂਦੇ ਹਨ
ਅਤੇ ਇਕ ਆ ਕੇ ਯੁੱਧ ਵਿੱਚ ਜੁੱਟ ਗਏ ਹਨ ॥੭੮੨॥
ਇਕ ਕਮਾਨਾਂ ਨੂੰ ਖਿੱਚ-ਖਿੱਚ ਕੇ
ਅਤੇ ਸੂਰਮਿਆਂ ਨੂੰ ਤਕ-ਤਕ ਕੇ ਬਾਣ ਮਾਰਦੇ ਹਨ।
ਇਕ ਭੱਜਦੇ-ਭੱਜਦੇ ਮਰ ਰਹੇ ਹਨ,
ਉਹ ਸੁਅਰਗ ਵਿੱਚ ਨਹੀਂ ਵੱਸ ਸਕਦੇ ॥੭੮੩॥
ਹਾਥੀ ਘੋੜੇ ਅਨੇਕਾਂ ਮਰ ਗਏ,
ਇਕ ਵੀ ਜਿਊਂਦਾ ਨਹੀਂ ਬਚਿਆ,
ਤਦ ਫਿਰ ਲੰਕਾ ਦੇ ਰਾਜੇ ਵਿਭੀਸ਼ਣ ਨੇ ਆ ਕੇ
ਬਾਲਕਾਂ ਨਾਲ ਯੁੱਧ ਕੀਤਾ ॥੭੮੪॥
ਬਹੋੜਾ ਛੰਦ
ਸ੍ਰੀ ਰਾਮ ਦੇ ਪੁੱਤਰ (ਲਵ) ਨੇ ਵਿਭੀਸ਼ਣ ਦੇ ਸੀਨੇ ਵਿੱਚ ਤਕ ਕੇ
ਅਤੇ ਸੰਕੋਚ ਛੱਡ ਕੇ ਤੀਰ ਮਾਰਿਆ
ਤਾਂ ਵਿਭੀਸ਼ਣ ਧਰਤੀ ਉੱਤੇ ਡਿੱਗ ਪਿਆ,
ਪਰ ਬੇਸੁੱਧ ਜਾਣ ਕੇ (ਲਵ ਨੇ) ਉਸ ਨੂੰ ਜਾਨੋ ਨਹੀਂ ਮਾਰਿਆ ॥੭੮੫॥
ਤਦੋਂ ਸੁਗ੍ਰੀਵ ਆ ਕੇ ਉਸ ਨਾਲ ਅੜ ਖੜੋਤਾ (ਤੇ ਕਹਿਣ ਲੱਗਾ-)
ਹੇ ਬਾਲਕ! ਕਿਥੇ ਜਾਂਦਾ ਹੈਂ ? ਜਾਂ ਨਹੀਂ ਪਾਏਂਗਾ।
ਤਦੋਂ (ਲਵ ਨੇ) ਉਸ ਦਾ ਮੱਥਾ ਵੇਖ ਕੇ ਬਾਣ ਮਾਰਿਆ,
ਜੋ ਉਸ ਦੇ ਮੱਥੇ ਵਿੱਚ ਲੱਗਾ ਅਤੇ (ਉਹ) ਹੱਕਾ-ਬੱਕਾ ਰਹਿ ਗਿਆ ॥੭੮੬॥
ਬੰਦਰਾਂ ਦੀ ਸੈਨਾ ਕ੍ਰੋਧਵਾਨ ਹੋ (ਉਸੇ ਵੇਲੇ) ਚਿੜ੍ਹ ਕੇ ਚਲ ਪਈ,
(ਜਿਸ ਵਿੱਚ) ਨਲ, ਨੀਲ, ਹਨੂਮਾਨ ਅਤੇ ਅੰਗਦ ਆਦਿ ਯੋਧੇ ਸਨ।
ਉਸੇ ਵੇਲੇ ਬਾਲਕਾਂ ਨੇ ਤਿੰਨ-ਤਿੰਨ ਤੀਰ ਲੈ ਕੇ ਕ੍ਰੋਧ ਨਾਲ
ਉਨ੍ਹਾਂ ਦੇ ਮੱਥੇ ਵਿੱਚ ਮਾਰ ਦਿੱਤੇ ॥੭੮੭॥
ਜੋ ਸੂਰਮੇ ਗਏ, ਉਹ ਰਣ-ਭੂਮੀ ਵਿੱਚ ਹੀ ਰਹੇ,
ਜੋ ਭੱਜ ਗਏ ਜਾਂ ਬੇਹੋਸ਼ ਹੋ ਗਏ, ਉਹੀ ਬਚੇ।
ਤਦ ਤਕ-ਤਕ ਕੇ ਬਾਲਕਾਂ ਨੇ ਕਸ-ਕਸ ਕੇ ਤੀਰ ਚਲਾਏ
ਅਤੇ ਨਿਸੰਗ ਹੋ ਕੇ ਸ੍ਰੀ ਰਾਮ ਦੀ ਸੈਨਾ ਮਾਰ ਦਿੱਤੀ ॥੭੮੮॥
ਅਨੂਪ ਨਰਾਜ ਛੰਦ
ਬਲਵਾਨਾਂ ਦਾ ਕ੍ਰੋਧ ਦੇਖ ਕੇ ਸ੍ਰੀ ਰਾਮ ਦੇ ਪੁੱਤਰ ਕ੍ਰੋਧਵਾਨ ਹੁੰਦੇ ਹਨ।
ਵਿਚਿਤ੍ਰ ਚਿੱਤਰਕਾਰੀ ਵਾਲੇ ਤੀਰਾਂ ਦੀ ਰਣ ਵਿੱਚ ਭਾਰੀ ਬਰਖਾ ਕਰਦੇ ਹਨ,
ਰਾਖਸ਼ਾਂ ਦੇ ਪੁੱਤਰ (ਵਿਭੀਸ਼ਣ ਆਦਿ) ਭੱਜ ਰਹੇ ਹਨ ਅਤੇ ਭਿਆਨਕ ਧੁੰਨ ਹੋ ਰਹੀ ਹੈ।
(ਦੋਵੇਂ ਬਾਲਕ) ਗੋਲ ਘੇਰੇ ਵਿੱਚ ਫਿਰਦੇ ਹਨ ਅਤੇ ਤੀਰਾਂ ਨਾਲ ਸਖਤ ਪੀੜਾਂ ਉਠਦੀਆਂ ਹਨ ॥੭੮੯॥
ਬਹੁਤੇ ਫੱਟੜ ਘੁੰਮਦੇ ਫਿਰਦੇ ਹਨ ਅਤੇ ਤਿੱਖੇ ਤੀਰਾਂ ਨਾਲ ਵਿੰਨ੍ਹਦੇ ਜਾਂਦੇ ਹਨ।
ਕਿਤਨੇ ਕਾਇਰ ਭੱਜ ਗਏ ਹਨ ਅਤੇ ਯੋਧੇ ਰਣ ਵਿੱਚ ਗੱਜਦੇ ਹਨ।
ਤਿੱਖੀਆਂ ਤਲਵਾਰਾਂ ਚੱਲਦੀਆਂ ਹਨ ਅਤੇ ਚਿੱਟੀਆਂ ਧਾਰਾਂ ਚਮਕਦੀਆਂ ਹਨ।
ਅੰਗਦ, ਕੇਸਰੀ, ਹਨੂਮਾਨ, ਸੁਗ੍ਰੀਵ ਆਦਿ ਬਹਾਦਰ ਡਿੱਗ ਪਏ ਹਨ ॥੭੯੦॥
(ਇਸ ਤਰ੍ਹਾਂ ਸੂਰਮੇ ਡਿੱਗੇ ਪਏ ਹਨ) ਮਾਨੋ ਹਵਾ ਦੇ ਜ਼ੋਰ ਨਾਲ ਬ੍ਰਿਛ ਧਰਤੀ ਉੱਤੇ ਡਿੱਗੇ ਪਏ ਹਨ।
ਧੂੜੀ ਨਾਲ ਬਹੁਤ ਭਰੇ ਹੋਏ ਹਨ ਅਤੇ ਮੂੰਹਾਂ ਤੋਂ ਲਹੂ ਦੀਆਂ ਉਲਟੀਆਂ ਕਰ ਰਹੇ ਹਨ।
ਆਕਾਸ਼ ਵਿੱਚ ਚੁੜੇਲਾਂ ਚੀਖਦੀਆਂ ਹਨ ਅਤੇ ਧਰਤੀ ਉੱਤੇ ਗਿਦੜੀਆਂ ਫਿਰਦੀਆਂ ਹਨ।
ਭੂਤ ਤੇ ਪ੍ਰੇਤ ਬੋਲ ਰਹੇ ਹਨ ਅਤੇ ਡਾਕਣੀਆਂ ਡਕਾਰਦੀਆਂ ਫਿਰਦੀਆਂ ਹਨ ॥੭੯੨॥
ਮੁਖੀ ਯੋਧੇ ਧਰਤੀ ਉੱਤੇ ਪਰਬਤਾਂ ਵਾਂਗ ਧੜਾ-ਧੜ ਡਿੱਗਦੇ ਹਨ।
(ਉਨ੍ਹਾਂ ਦੇ) ਸਰੀਰ ਲਹੂ ਨਾਲ ਗੜੁੱਚ ਹਨ ਅਤੇ (ਰਣ ਵਿੱਚ) ਡਰਾਉਣੀ ਆਵਾਜ਼ ਹੋ ਰਹੀ ਹੈ।