ਸ਼੍ਰੀ ਦਸਮ ਗ੍ਰੰਥ
ਅੰਗ - 556
ਨ ਪ੍ਰੀਤਿ ਮਾਤ ਸੰਗਾ ॥
ਮਾਤਾ ਨਾਲ ਪ੍ਰੀਤ ਨਹੀਂ ਹੋਵੇਗੀ।
ਅਧੀਨ ਅਰਧੰਗਾ ॥੪੦॥
ਪਤਨੀ ਦੇ ਅਧੀਨ ਹੋਣਗੇ ॥੪੦॥
ਅਭਛ ਭਛ ਭਛੈ ॥
ਨ ਖਾਣ ਯੋਗ ਵਸਤੂਆਂ ਨੂੰ ਖਾਣਗੇ।
ਅਕਛ ਕਾਛ ਕਛੈ ॥
ਨਾ ਫਿਰਨ ਵਾਲੇ ਸਥਾਨਾਂ ਉਤੇ ਫਿਰਨਗੇ (ਅਰਥਾਂਤਰ-ਨ ਧਾਰਨ ਕਰਨ ਯੋਗ ਰੂਪ ਧਾਰਨ ਕਰਨਗੇ)।
ਅਭਾਖ ਬੈਨ ਭਾਖੈ ॥
ਨਾ ਬੋਲਣ ਯੋਗ ਬੋਲ ਬੋਲਣਗੇ।
ਕਿਸੂ ਨ ਕਾਣਿ ਰਾਖੈ ॥੪੧॥
ਕਿਸੇ ਦੀ ਪਰਵਾਹ ਨਹੀਂ ਕਰਨਗੇ ॥੪੧॥
ਅਧਰਮ ਕਰਮ ਕਰ ਹੈ ॥
ਅਧਰਮ ਦੇ ਕਰਮ ਕਰਨਗੇ।
ਨ ਤਾਤ ਮਾਤ ਡਰਿ ਹੈ ॥
ਪਿਤਾ ਮਾਤਾ ਤੋਂ ਨਹੀਂ ਡਰਨਗੇ।
ਕੁਮੰਤ੍ਰ ਮੰਤ੍ਰ ਕੈ ਹੈ ॥
ਮਾੜੇ ਸਲਾਹਕਾਰਾਂ ਨਾਲ ਸਾਲਾਹ ਕਰਨਗੇ।
ਸੁਮੰਤ੍ਰ ਕੋ ਨ ਲੈ ਹੈ ॥੪੨॥
ਚੰਗੀ ਸਲਾਹ ਨੂੰ ਗ੍ਰਹਿਣ ਨਹੀਂ ਕਰਨਗੇ ॥੪੨॥
ਅਧਰਮ ਕਰਮ ਕੈ ਹੈ ॥
ਅਧਰਮ ਵਾਲਾ ਕਰਮ ਕਰਨਗੇ।
ਸੁ ਭਰਮ ਧਰਮ ਖੁਐ ਹੈ ॥
ਚੰਗੇ ਧਰਮ ਨੂੰ ਭਰਮਾਂ ਵਿਚ ਗੰਵਾ ਦੇਣਗੇ।
ਸੁ ਕਾਲ ਫਾਸਿ ਫਸ ਹੈ ॥
ਉਹ ਕਾਲ ਦੀ ਫਾਹੀ ਵਿਚ ਫਸ ਜਾਣਗੇ।
ਨਿਦਾਨ ਨਰਕ ਬਸਿ ਹੈ ॥੪੩॥
ਅੰਤ ਵਿਚ ਨਰਕ ਵਿਚ ਵਾਸਾ ਕਰਨਗੇ ॥੪੩॥
ਕੁਕਰਮ ਕਰਮ ਲਾਗੇ ॥
ਭੈੜੇ ਕੰਮ ਕਰਨ ਵਿਚ ਲਗਣਗੇ।
ਸੁਧਰਮ ਛਾਡਿ ਭਾਗੇ ॥
ਚੰਗੇ ਧਰਮ ਨੂੰ ਛਡ ਕੇ ਭਜ ਜਾਣਗੇ।
ਕਮਾਤ ਨਿਤ ਪਾਪੰ ॥
ਨਿੱਤ ਪਾਪ ਕਮਾਉਣਗੇ।
ਬਿਸਾਰਿ ਸਰਬ ਜਾਪੰ ॥੪੪॥
ਸਾਰੇ ਜਾਪਾਂ ਨੂੰ ਭੁਲਾ ਦੇਣਗੇ ॥੪੪॥
ਸੁ ਮਦ ਮੋਹ ਮਤੇ ॥
ਉਹ ਹੰਕਾਰ ਅਤੇ ਮੋਹ ਵਿਚ ਮਸਤ ਹੋਣਗੇ।
ਸੁ ਕਰਮ ਕੇ ਕੁਪਤੇ ॥
ਚੰਗੇ ਕਰਮ (ਕਰਨ ਵਿਚ) ਨਿਖਿਧ ਹੋਣਗੇ।
ਸੁ ਕਾਮ ਕ੍ਰੋਧ ਰਾਚੇ ॥
ਉਹ ਕਾਮ ਕ੍ਰੋਧ ਵਿਚ ਮਗਨ ਹੋਣਗੇ।
ਉਤਾਰਿ ਲਾਜ ਨਾਚੇ ॥੪੫॥
ਲਾਜ-ਮਰਯਾਦਾ ਨੂੰ ਤਿਆਗ ਕੇ ਨਚਣਗੇ ॥੪੫॥
ਨਗ ਸਰੂਪੀ ਛੰਦ ॥
ਨਗ ਸਰੂਪੀ ਛੰਦ:
ਨ ਧਰਮ ਕਰਮ ਕਉ ਕਰੈ ॥
ਧਰਮ ਦੇ ਕਰਮ ਨੂੰ ਨਹੀਂ ਕਰਨਗੇ।
ਬ੍ਰਿਥਾ ਕਥਾ ਸੁਨੈ ਰਰੈ ॥
ਵਿਅਰਥ ਦੀ ਕਥਾ ਸੁਣਨ ਅਤੇ ਪੜ੍ਹਨਗੇ।
ਕੁਕਰਮ ਕਰਮਿ ਸੋ ਫਸੈ ॥
ਕੁਕਰਮਾਂ ਨੂੰ ਕਰਨ ਵਿਚ ਫਸੇ ਹੋਣਗੇ।
ਸਤਿ ਛਾਡਿ ਧਰਮ ਵਾ ਨਸੈ ॥੪੬॥
ਉਹ ਸੱਚੇ ਧਰਮ ਨੂੰ ਛਡ ਕੇ ਭਜਣਗੇ ॥੪੬॥
ਪੁਰਾਣ ਕਾਬਿ ਨ ਪੜੈ ॥
ਪੁਰਾਣ ਅਤੇ ਕਾਵਿ ਨੂੰ ਨਹੀਂ ਪੜ੍ਹਨਗੇ।
ਕੁਰਾਨ ਲੈ ਨ ਤੇ ਰੜੈ ॥
ਕੁਰਾਨ ਨੂੰ ਲੈ ਕੇ ਨਹੀਂ ਉਚਾਰਨਗੇ।
ਅਧਰਮ ਕਰਮ ਕੋ ਕਰੈ ॥
ਅਧਰਮ ਦੇ ਕਰਮ ਕਰਨਗੇ।
ਸੁ ਧਰਮ ਜਾਸੁ ਤੇ ਡਰੈ ॥੪੭॥
ਚੰਗੇ ਧਰਮ ਦੇ ਜਸ ਤੋਂ ਡਰਨਗੇ ॥੪੭॥
ਧਰਾਕਿ ਵਰਣਤਾ ਭਈ ॥
ਧਰਤੀ ਇਕ ਵਰਣ ਵਾਲੀ ਹੋ ਜਾਏਗੀ।
ਸੁ ਭਰਮ ਧਰਮ ਕੀ ਗਈ ॥
ਚੰਗੇ ਧਰਮ ਦਾ ਭਰਮ (ਜਾਂ ਭਰੋਸਾ) ਖ਼ਤਮ ਹੋ ਜਾਵੇਗਾ।
ਗ੍ਰਿਹੰ ਗ੍ਰਿਹੰ ਨਯੰ ਮਤੰ ॥
ਘਰ ਘਰ ਵਿਚ ਨਵੇਂ ਮਤ ਹੋਣਗੇ।
ਚਲੇ ਭੂਅੰ ਜਥਾ ਤਥੰ ॥੪੮॥
ਧਰਤੀ ਉਤੇ (ਲੋਕੀਂ) ਯਥਾ-ਵਤ ਵਿਵਹਾਰ ਕਰਨਗੇ ॥੪੮॥
ਗ੍ਰਿਹੰ ਗ੍ਰਿਹੰ ਨਏ ਮਤੰ ॥
ਘਰ ਘਰ ਨਵੇਂ ਮਤ ਹੋਣਗੇ।
ਭਈ ਧਰੰ ਨਈ ਗਤੰ ॥
ਧਰਤੀ ਦੀ ਨਵੀਂ ਸਥਿਤੀ ਹੋਵੇਗੀ।
ਅਧਰਮ ਰਾਜਤਾ ਲਈ ॥
ਅਧਰਮ ਦੀ ਬਾਦਸ਼ਾਹੀ ਹੋਵੇਗੀ।
ਨਿਕਾਰਿ ਧਰਮ ਦੇਸ ਦੀ ॥੪੯॥
ਧਰਮ ਨੂੰ ਦੇਸੋਂ ਕਢ ਦਿੱਤਾ ਜਾਵੇਗਾ ॥੪੯॥
ਪ੍ਰਬੋਧ ਏਕ ਨ ਲਗੈ ॥
(ਬ੍ਰਹਮ) ਗਿਆਨ ਵਿਚ ਇਕ ਵੀ ਨਹੀਂ ਲਗੇਗਾ।
ਸੁ ਧਰਮ ਅਧਰਮ ਤੇ ਭਗੈ ॥
ਉਹ ਅਧਰਮ (ਕਰਨਗੇ ਅਤੇ) ਧਰਮ ਤੋਂ ਭਜਣਗੇ।
ਕੁਕਰਮ ਪ੍ਰਚੁਰਯੰ ਜਗੰ ॥
ਜਗਤ ਵਿਚ ਮਾੜੇ ਕਰਮ ਬਹੁਤ ਅਧਿਕ ਹੋਣਗੇ।
ਸੁ ਕਰਮ ਪੰਖ ਕੈ ਭਗੰ ॥੫੦॥
ਚੰਗੇ ਕਰਮ ਖੰਭ ਲਾ ਕੇ ਭਜ ਜਾਣਗੇ ॥੫੦॥
ਪ੍ਰਪੰਚ ਪੰਚ ਹੁਇ ਗਡਾ ॥
ਪ੍ਰਪੰਚ (ਪਾਖੰਡ) ਪ੍ਰਧਾਨਤਾ ਪ੍ਰਾਪਤ ਕਰ ਕੇ ਦ੍ਰਿੜ੍ਹ ਹੋ ਜਾਵੇਗਾ।
ਅਪ੍ਰਪੰਚ ਪੰਖ ਕੇ ਉਡਾ ॥
ਅਪ੍ਰਪੰਚ (ਸਚਾਈ) ਖੰਭ ਲਾ ਕੇ ਉਡ ਪੁਡ ਜਾਵੇਗੀ।
ਕੁਕਰਮ ਬਿਚਰਤੰ ਜਗੰ ॥
(ਸਾਰਾ) ਜਗਤ ਕੁਕਰਮਾਂ ਵਿਚ ਲਗ ਜਾਵੇਗਾ।
ਸੁਕਰਮ ਸੁ ਭ੍ਰਮੰ ਭਗੰ ॥੫੧॥
ਸ਼ੁਭ ਕਰਮ ਭਰਮ ਬਣ ਕੇ ਭਜ ਜਾਣਗੇ ॥੫੧॥
ਰਮਾਣ ਛੰਦ ॥
ਰਮਾਣ ਛੰਦ: