ਦ੍ਰਿਗਨ ਨੇਤ੍ਰਾਂ ਨਾਲ ਤੱਕ ਤੱਕ ਕੇ ਭੀ ਦਰਸ਼ਨ ਦੀ ਮਹਿਮਾ ਨੂੰ ਨਾ ਜਾਣਿਆ ਤੇ ਸੁਣ ਸੁਣ ਕੇ ਕੰਨਾਂ ਦ੍ਵਾਰੇ ਉਪਦੇਸ਼ ਸ਼ਬਦ ਦੇ ਮਹਾਤਮ ਪ੍ਰਭਾਵ ਨੂੰ ਨਾ ਸਮਝਿਆ।
ਗੌਂਦਿਆਂ ਗੌਂਦਿਆਂ ਰਸਨਾ ਨਾਲ ਗੁਣ ਨਿਧਾਨ ਗੁਣਾਂ ਦੇ ਭੰਡਾਰ ਸਤਿਗੁਰਾਂ ਦੇ ਗੁਨ ਗਨ ਸਮੂਹ ਗੁਣਾਂ ਨੂੰ ਨਾ ਪਛਾਤਾ ਵਾ ਗੁਨਗ ਗੁਣ ਗ੍ਯਾਤਾ ਹੋਣ ਦੀ ਗੰਮਤਾ ਪ੍ਰਾਪਤ ਨਾ ਕੀਤੀ ਅਰੁ ਹਸ ਹਸ ਕੇ ਕੌਤੁਕਾਂ ਬਿਨੋਦਾਂ ਚੋਜਾਂ ਉਪਰ ਪ੍ਰੇਮ ਦਾ ਪ੍ਰਤਾਪ ਮਹੱਤ ਨਾ ਪਛਾਣਿਆ।
ਸੰਸਾਰੀ ਪਦਾਰਥਾਂ ਪਿਛੇ ਤਾਂ ਰੋ ਰੋ ਢਾਹਾਂ ਮਾਰੀਆਂ; ਕਿੰਤੂ ਪ੍ਰੇਮ ਤੋਂ ਹੋਣ ਹਾਰੇ ਵਿਛੋੜੇ ਦ੍ਵਾਰੇ ਹੋਣ ਵਾਲੇ ਸੋਗ ਰੂਪ ਦੁੱਖ ਨੂੰ ਨਾ ਜਾਤਾ ਅਤੇ ਮਨ ਨੇ ਪਕੜ ਵਿਚ ਪਕੜ ਸੰਸਾਰ ਦੀ ਕੀਤੀ ਪਰ ਇਹ ਮੂਰਖ ਮਨ ਵਾਹਗੁਰੂ ਦੇ ਮਾਰਗ ਵਿਚ ਨਾ ਮੰਨਿਆ।
ਲੌਕਿਕ ਗ੍ਯਾਨ ਦ੍ਵਾਰੇ ਵਾ ਬੇਦਿਕ ਗ੍ਯਾਨ ਦ੍ਵਾਰੇ ਅਥਵਾ ਅਨੁਮਾਨ ਕਰ ਕੇ ਇਹ ਮਨੁੱਖ ਉਕਤ ਦਰਸ਼ਨ ਸ਼ਬਦ ਸਿਮਰਣ ਵਾ ਕੀਰਤਨ ਆਦਿ ਦੀ ਸਤ੍ਯਤਾਸਤ੍ਯ ਵਸਤੂ ਨੂੰ ਨਹੀਂ ਜਾਣ ਸਕਿਆ; ਤਾਂ ਤੇ ਧਿਰਕਾਰ ਲਾਨ੍ਹਤ ਹੈ ਇਸ ਦੇ ਮਨੁੱਖ ਹੋ ਜੰਮਣ ਨੂੰ; ਤਥਾ ਇਸ ਦੀ ਜਿੰਦਗੀ ਨੂੰ ਜਿਹੜੀ ਕਿ ਏਸ ਨੇ ਬੇਮੁਖਤਾ ਵਿਚ ਬਿਤਾਈ ਹੈ ॥੪੨੦॥