ਕਬਿਤ ਸਵਯੇ ਭਾਈ ਗੁਰਦਾਸ ਜੀ

ਅੰਗ - 480

ਮਨ ਬਚ ਕ੍ਰਮ ਕੈ ਪਤਿਬ੍ਰਤ ਕਰੈ ਜਉ ਨਾਰਿ ਤਾਹਿ ਮਨ ਬਚ ਕ੍ਰਮ ਚਾਹਤ ਭਤਾਰ ਹੈ ।

ਮਨ ਬਾਣੀ ਸਰੀਰ ਕਰ ਕੇ ਜੇਕਰ ਇਸਤ੍ਰੀ ਪਤੀਬ੍ਰਤ ਧਰਮ ਦਾ ਪਾਲਨ ਕਰੇ ਤਾਂ ਓਸ ਇਸਤ੍ਰੀ ਨੂੰ ਭਤਾਰ ਪਤੀ ਭੀ ਮਨ ਬਾਣੀ ਸਰੀਰ ਕਰ ਕੇ ਚਾਹਿਆ ਹੀ ਕਰਦਾ ਹੈ।

ਅਭਰਨ ਸਿੰਗਾਰ ਚਾਰ ਸਿਹਜਾ ਸੰਜੋਗ ਭੋਗ ਸਕਲ ਕੁਟੰਬ ਹੀ ਮੈ ਤਾ ਕੋ ਜੈਕਾਰੁ ਹੈ ।

ਸੁੰਦਰ ਸੁੰਦਰ ਗਹਣੇ ਤਥਾ ਸ਼ਿੰਗਾਰ ਨੂੰ ਧਾਰਣ ਕਰਣ ਹਾਰੀ ਅਤੇ ਸਿਹਜਾ, ਸੰਜੋਗ ਦੇ ਮਾਨਣਹਾਰੀ ਉਹੀ ਬਣਦੀ ਹੈ ਅਰੁ ਸਾਰੇ ਕੁਟੰਬ ਵਿਚ ਭੀ ਓਸੇ ਦਾ ਹੀ ਜੈ ਜੈ ਕਾਰ ਹੋਯਾ ਰਹਿੰਦਾ ਹੈ।

ਸਹਜ ਆਨੰਦ ਸੁਖ ਮੰਗਲ ਸੁਹਾਗ ਭਾਗ ਸੁੰਦਰ ਮੰਦਰ ਛਬਿ ਸੋਭਤ ਸੁਚਾਰੁ ਹੈ ।

ਗੱਲ ਕੀਹ ਕਿ ਸਭ ਪ੍ਰਕਾਰ ਸੁਹਾਗ ਭਾਗ ਦੇ ਮੰਗਲ ਮਈ ਸੁਖ ਦਾ ਆਨੰਦ ਸਹਜੇ ਸੁਤੇ ਹੀ ਮਾਣਦੀ ਹੋਈ ਉਹ ਸੁੰਦਰ ਮੰਦਿਰਾਂ ਅੰਦਰ, ਸੁਚਾਰ ਛਬਿ ਸੋਭਤ ਹੈ, ਸ੍ਰੇਸ਼ਟ ਛਬਿ ਫੱਬਨ ਨਾਲ ਸੋਹਣੀ ਲਗਿਆ ਫਬ ਫਬ ਪਿਆ ਕਰਦੀ ਹੈ।

ਸਤਿਗੁਰ ਸਿਖਨ ਕਉ ਰਾਖਤ ਗ੍ਰਿਸਤਿ ਮੈ ਸਾਵਧਾਨ ਆਨ ਦੇਵ ਸੇਵ ਭਾਉ ਦੁਬਿਧਾ ਨਿਵਾਰ ਹੈ ।੪੮੦।

ਤਿਸੀ ਪ੍ਰਕਾਰ ਸਤਿਗੁਰੂ ਅਪਣਿਆਂ ਸਿੱਖਾਂ ਨੂੰ ਗ੍ਰਹਸਥ ਆਸ਼ਰਮ ਵਿਚ ਵਰਤਦਿਆਂ ਭੀ ਸਾਵਧਾਨ ਉਦਮੀ ਬਣਾਈ ਰਖ੍ਯਾ ਕਰਦੇ ਹਨ, ਅਤੇ ਹੋਰ ਦੇਵਾਂ ਦੀ ਸੇਵਾ ਵਾਲੇ ਦੁਬਿਧਾ ਭਾਵ ਨੂੰ ਨਿਵਾਰਣ ਕਰੀ ਰਖਦੇ ਯਾ ਪੋਹਨ ਨਹੀਂ ਦਿਆ ਕਰਦੇ ਹਨ ॥੪੮੦॥

ਸੂਚੀ (1 - 675)

ਕਬਿਤ ਸਵਯੇ ਅੰਗ: 1 - 675