ਜਿਸ ਤਰ੍ਹਾਂ ਫੁੱਲਾਂ ਵਿੱਚੋਂ ਸੁਗੰਧੀ ਲੈ ਕੇ ਤਿਲਾਂ ਨੂੰ ਸੁਗੰਧਤ ਬਨਾ ਲਈਦਾ ਹੈ ਤੇ ਜਤਨ ਨਾਲ ਫੇਰ ਉਨ੍ਹਾਂ ਤੋਂ ਫੁਲੇਲ ਪ੍ਰਗਟ ਕਰ ਲਈਦੀ ਹੈ, ਐਸੇ ਪ੍ਰਸਿੱਧ ਹੈ।
ਫੇਰ ਜਿਸ ਤਰ੍ਹਾਂ ਦੁੱਧ ਨੂੰ ਉਬਾਲ ਕੇ, ਜਾਗ ਲਾ ਜਮਾਈਦਾ ਹੈ ਤੇ ਓਸ ਨੂੰ ਰਿੜਕ ਕੇ ਬਿਧੀ ਨਾਲ ਘਿਉ ਕੱਢ ਲੈਣ ਮੰਨ੍ਯਾ ਹੈ।
ਜਿਸ ਤਰ੍ਹਾਂ ਖੂਹ ਪੁੱਟ ਧਰਤੀ ਵਿਚ ਕੋਠੀਆਂ ਗਾਲਿਆਂ ਲੱਜ ਦ੍ਵਾਰਾ ਡੋਲ ਵਗਾ ਕੇ ਪਾਣੀ ਕੱਢ ਲਿਆਈਦਾ ਹੈ,
ਤਿਸੀ ਪ੍ਰਕਾਰ ਸ਼ਰਧਾ ਭੌਣੀ ਨਾਲ ਗੁਰ ਉਪਦੇਸ਼ ਸ਼ਬਦ ਦੀ ਕਮਾਈ ਕੀਤਿਆਂ, ਘਟਿ ਘਟਿ ਸਰੀਰ ਸਰੀਰ ਅੰਤਾਕਰਣ ਵਿਖੇ ਹਰ ਇਕ ਅੰਦਰ ਆਤਮਾ = ਹਰੀ ਪੂਰਨ ਬ੍ਰਹਮ ਰਮ੍ਯਾ ਹੋਯਾ ਪਛਾਣ ਲਈਦਾ ਹੈ ॥੫੩੫॥