ਚੰਨਣ ਦੇ ਨੇੜੇ ਵੱਸਦੇ ਭੀ ਵਾਂਸ ਨੇ ਓਸ ਦੀ ਮਹਿਮਾ ਨੂੰ ਨਾ ਜਾਣਿਆ, ਪਰ ਹੋਰਨਾਂ ਬੂਟਿਆਂ ਨੇ ਦੂਰ ਦੂਰ ਹੁੰਦ੍ਯਾਂ ਭੀ ਓਸ ਦੀ ਸੁਗੰਧੀ ਨਾਲ ਅਪਣੇ ਤਾਂਈ ਸੁਗੰਧਿਤ ਬਣਾ ਲਿਆ।
ਡਡੂ ਨੇ ਸਰੋਵਰ ਅੰਦਰ ਵੱਸਦਿਆਂ ਭੀ ਕੌਲ ਫੁੱਲ ਦੀ ਗਤੀ ਸਾਰ ਨਾ ਜਾਣੀ; ਕਿੰਤੂ ਸ੍ਰੋਵਰ ਤੋਂ ਦੂਰ ਰਹਿੰਦਿਆਂ ਭੀ ਭੌਰੇ ਦਾ ਮਨ ਕੌਲ ਫੁਲ ਦੇ ਸੁਗੰਧੀ ਰਸ ਉਪਰ ਬਹੁਤ ਮੋਹਿਤ ਹੋਇਆ ਰਹਿੰਦਾ ਹੈ।
ਤੀਰਥ ਉਪਰ ਵੱਸਣਹਾਰੇ ਬਗਲੇ ਸਮਾਨ ਲੋਕਾਂ ਨੇ ਤਾਂ ਕੁਛ ਓਸ ਦਾ ਮਰਮ ਨਹੀਂ ਜਾਣਿਆ, ਪ੍ਰੰਤੂ ਜਾਤ੍ਰੀ ਲੋਕ ਸ਼ਰਧਾ ਨਾਲ ਜਾਤ੍ਰਾ ਵਾਸਤੇ ਆਣ ਕੇ ਸੋਭਾ ਨੂੰ ਪ੍ਰਾਪਤ ਹੋਇਆ ਪੁੰਨ ਵਾਨ ਬਣਿਆ ਕਰਦੇ ਹਨ।
ਇਸੇ ਪ੍ਰਕਾਰ ਸਤਿਗੁਰਾਂ ਦੇ ਸਮੀਪ ਵੱਸਦਿਆਂ ਭੀ ਮੈਂ ਗੁਰ ਉਪਦੇਸ਼ ਕਮਾਨ ਤੋਂ ਹੀਣਾ ਸੱਖਣਾ ਹੀ ਰਿਹਾ ਤੇ ਦੂਰ ਦੂਰੰਤਰੋਂ ਸਿੱਖ ਆਣ ਕੇ ਉਪਦੇਸ਼ ਲੈ ਲੈ ਕੇ ਹਿਰਦੇ ਅੰਦਰ ਉਸ ਨੂੰ ਪ੍ਰੋ ਲਿਆ ਕਰਦੇ ਹਨ ॥੫੦੭॥