ਕਬਿਤ ਸਵਯੇ ਭਾਈ ਗੁਰਦਾਸ ਜੀ
ਅੰਗ - 631
ਜੈਸੇ ਮਾਲਾ ਮੇਰ ਪੋਈਅਤ ਸਭ ਊਪਰ ਕੈ ਸਿਮਰਨ ਸੰਖ੍ਯਾ ਮੈ ਨ ਆਵਤ ਬਡਾਈ ਕੈ ।
ਜਿਵੇਂ ਮਾਲਾ ਦਾ ਸ਼੍ਰੋਮਣੀ ਮਣਕਾ ਬਾਕੀ ਸਾਰੇ ਮਣਕਿਆਂ ਤੋਂ ਉਪਰ ਕਰ ਕੇ ਪ੍ਰੋਈਦਾ ਹੈ, ਪਰ ਉਹ ਸਿਮਰਨ ਵਾਲੇ ਮਣਕਿਆਂ ਦੀ ਗਿਣਤੀ ਵਿਚ ਨਹੀਂ ਆਉਂਦਾ ਉਸ ਦੀ ਵਡਾਈ ਕਿਸ ਕੰਮ?
ਜੈਸੇ ਬਿਰਖਨ ਬਿਖੈ ਪੇਖੀਐ ਸੇਬਲ ਊਚੋ ਨਿਹਫਲ ਭਇਓ ਸੋਊ ਅਤਿ ਅਧਿਕਾਰੀ ਕੈ ।
ਜਿਵੇਂ ਬ੍ਰਿਛਾਂ ਵਿਚੋਂ ਸਿੰਮਲ ਬ੍ਰਿਛ ਸਭ ਤੋਂ ਉੱਚਾ ਦੇਖਿਆ ਜਾਂਦਾ ਹੈ, ਪਰ ਉਹ ਬਹੁਤੇ ਵਡੱਪਣ ਨੇ ਫਲ ਹੀਨ ਕਰ ਦਿਤਾ ਉਸ ਦਾ ਵੱਡਾ ਹੋਣਾ ਫਿਰ ਕਿਸ ਕੰਮ?
ਜੈਸੇ ਚੀਲ ਪੰਛੀਨ ਮੈ ਉਡਤ ਅਕਾਸਚਾਰੀ ਹੇਰੇ ਮ੍ਰਿਤ ਪਿੰਜਰਨ ਊਚੈ ਮਤੁ ਪਾਈ ਕੈ ।
ਜਿਵੇਂ ਇੱਲ ਹੋਰਨਾਂ ਪੰਛੀਆਂ ਨਾਲੋਂ ਅਕਾਸ਼ ਵਿਚ ਉੱਚਾ ਉਡਦੀ ਹੈ, ਪਰ ਉੱਚੇ ਉਡ ਕੇ ਦੇਖਦੀ ਹੈ ਮੁਰਦੇ ਪਸ਼ੂਆਂ ਦੇ ਪਿੰਜਰਾਂ ਨੂੰ; ਕਿਸ ਕੰਮ ਉਸ ਦੀ ਉੱਚੀ ਮਤ ਪਾਈ?
ਗਾਇਬੋ ਬਜਾਇਬੋ ਸੁਨਾਇਬੋ ਨ ਕਛੂ ਤੈਸੇ ਗੁਰ ਉਪਦੇਸ ਬਿਨਾ ਧ੍ਰਿਗ ਚਤੁਰਾਈ ਕੈ ।੬੩੧।
ਤਿਵੇਂ ਗਾਉਣਾ, ਵਜਾਉਣਾ ਤੇ ਸੁਨਾਉਣਾ ਕੁਝ ਨਹੀਂ ਹੈ, ਜਿਸ ਵਿਚ ਉੱਚੀ ਚਾਤੁਰੀ ਤਾਂ ਪਈ ਹੋਵੇ, ਪਰ ਉਹ ਗੁਰ ਉਪਦੇਸ਼ ਤੋਂ ਬਿਨਾਂ ਹੋਵੇ, ਤਾਂ ਉਸ ਚਤੁਰਾਈ ਨੂੰ ਧ੍ਰਿਕਾਰ ਹੈ ॥੬੩੧॥