ਸੀਸ ਗੁਰੂ ਚਰਨਾਂ ਨੂੰ ਲਾ ਲਾ ਕੇ, ਕੰਨਾਂ ਨਾਲ ਉਪਦੇਸ਼ ਤੇ ਗੁਰਮੰਤ੍ਰ ਸੁਣ ਸੁਣ ਕੇ ਨੈਣਾਂ ਨਾਲ ਦਰਸ਼ਨ ਦੇਖ ਕੇ ਸੁਖ ਪਾਈਏ।
ਰਸਨਾ ਨਾਲ ਗੁਰੂ ਕੇ ਸ਼ਬਦ ਗਾਂਵੀਏ, ਹੱਥਾਂ ਨਾਲ ਸੇਵਾ ਤੇ ਡੰਡੌਤਾਂ ਕਰ ਕਰ ਕੇ ਹਿਰਦੇ ਵਿਚ ਗੁਰੂ ਗਿਆਨ ਨੂੰ ਪਾ ਕੇ ਉਨਮਨੀ ਲਿਵ ਲਾਈਏ।
ਚਰਨ ਸਾਧ ਸੰਗਤ ਦੀ ਪਰਿਕਰਮਾ ਵਾਸਤੇ ਜਾਣ, ਮਤ ਨਿੰਮ੍ਰਤਾ ਵਿਚ ਐਸੀ ਸਮਾਵੇ ਕਿ ਦਾਸਾਂ ਦੀ ਦਾਸ ਹੋ ਜਾਵੇ।
ਸੰਤਾਂ ਦੀ ਧੂੜੀ ਵਿਚ ਇਸ਼ਨਾਨ ਹੋਵੇ, ਪ੍ਰੇਮਾ ਭਗਤੀ ਦਾ ਭੋਜਨ ਸਾਂਨੂੰ ਦਿਉ, ਇਸ ਪ੍ਰਕਾਰ ਹੇ ਸ੍ਰੀ ਗੁਰੂ ਜੀ ਮਹਾਰਾਜ! ਕ੍ਰਿਪਾ ਕਰ ਕੇ ਮੇਰੀ ਪ੍ਰੇਮ ਦੀ ਪੈਜ ਨੂੰ ਆਪ ਆਪਣੇ ਦੁਆਰੇ ਉੱਜਲ ਕਰ ਦਿਉ ॥੬੨੮॥