ਕਬਿਤ ਸਵਯੇ ਭਾਈ ਗੁਰਦਾਸ ਜੀ
ਅੰਗ - 508
ਜੈਸੇ ਪਰ ਦਾਰਾ ਕੋ ਦਰਸੁ ਦ੍ਰਿਗ ਦੇਖਿਓ ਚਾਹੈ ਤੈਸੇ ਗੁਰ ਦਰਸਨੁ ਦੇਖਤ ਹੈ ਨ ਚਾਹ ਕੈ ।
ਜਿਸ ਤਰ੍ਹਾਂ ਨੇਤ੍ਰ ਪਰਾਈ ਇਸਤ੍ਰੀ ਦਾ ਦਰਸ਼ਨ ਦੇਖਣਾ ਚਾਹੁੰਦੇ ਹਨ, ਇਸੇ ਤਰ੍ਹਾਂ ਹੀ ਚਾਹਨਾ ਨਾਲ ਸਤਿਗੁਰਾਂ ਦੇ ਦਰਸ਼ਨ ਨਹੀਂ ਕਰਦੇ।
ਜੈਸੇ ਪਰ ਨਿੰਦਾ ਸੁਨੈ ਸਾਵਧਾਨ ਸੁਰਤਿ ਕੈ ਤੈਸੇ ਗੁਰ ਸਬਦੁ ਸੁਨੈ ਨ ਉਤਸਾਹ ਕੈ ।
ਜਿਸ ਭਾਂਤ ਕੰਨ ਪਰਾਈ ਨਿੰਦਾ ਸੁਨਣ ਖਾਤਰ ਸਾਵਧਾਨ ਰਹਿੰਦੇ ਹਨ, ਓਸੇ ਤਰ੍ਹਾਂ ਗੁਰ ਸ਼ਬਦ ਨੂੰ ਉਤਸ਼ਾਹ ਧਾਰ ਕੇ ਨਹੀਂ ਸੁਣਦੇ।
ਜੈਸੇ ਪਰ ਦਰਬ ਹਰਨ ਕਉ ਚਰਨ ਧਾਵੈ ਤੈਸੇ ਕੀਰਤਨ ਸਾਧਸੰਗਤਿ ਨ ਉਮਾਹ ਕੈ ।
ਜਿਸ ਤਰ੍ਹਾਂ ਪਰਾਇਆ ਦਰਬ ਪਦਾਰਥ ਹਰਨ ਵਾਸਤੇ ਪੈਰ ਦੌੜਦੇ ਕਾਹਲੇ ਹੁੰਦੇ ਹਨ, ਇਸ ਤਰ੍ਹਾਂ ਸਾਧ ਸੰਗਤਿ ਅੰਦਰ ਕੀਰਤਨ ਸੁਨਣ ਲਈ ਉਮੰਗ ਨਹੀਂ ਕਰਿਆ ਕਰਦੇ।
ਉਲੂ ਕਾਗ ਨਾਗਿ ਧਿਆਨ ਖਾਨ ਪਾਨ ਕਉ ਨ ਜਾਨੈ ਊਚ ਪਦੁ ਪਾਵੈ ਨਹੀ ਨੀਚ ਪਦੁ ਗਾਹ ਕੈ ।੫੦੮।
ਉੱਲੂ ਚੂਹੀਆਂ ਰਾਤ ਨੂੰ ਮਾਰ ਖਾਣ ਕਾਂ ਵਿਸ਼ਟਾ ਮੈਲ ਆਹਾਰ ਕਰਨ ਅਰੁ ਨਾਗ ਸੱਪ ਮਿਟੀ ਜਾਂ ਜੀਵ ਘਾਤ ਕਰ ਕੇ ਖਾਣ; ਅਥਵਾ ਪੌਣ ਦੇ ਪੀਣੇ ਵਿਚ ਹੀ ਧ੍ਯਾਨ ਰਖਦੇ ਹਨ, ਇਸ ਤੋਂ ਸਿਵਾਯ ਹੋਰ ਖਾਣਾ ਪੀਣਾ ਕੁਛ ਇਹ ਜਾਣਦੇ ਹੀ ਨਹੀਂ ਹਨ। ਇਸੇ ਤਰ੍ਹਾਂ ਨੀਚ ਪਦ ਨੀਚ ਭਾਵਾਂ ਵਿਚ ਵਰਤਣ ਵਾਲੇ ਪੁਰਖ ਊਚ ਪਦ ਪਾਵੈ ਨਹੀ ਉੱਚੇ ਮਰਾਤਬੇ ਸਤਿਸੰਗਤ ਆਦਿ ਨੂੰ ਨਹੀਂ ਪ੍ਰਾਪਤ ਹੋਣ ਦਾ ਖ੍ਯਾਲ ਪੈਦਾ ਕਰਦੇ ॥੫੦੮॥