ਜਿਵੇਂ ਨਾਇਕਾ ਆਪਣੇ ਪਿਆਰੇ ਦੇ ਪ੍ਰੇਮ ਰਸ ਨੂੰ ਯਾਦ ਕਰ ਕਰ ਕੇ ਅਸਚਰਜ ਹੁੰਦੀ ਰਹਿੰਦੀ ਹੈ ਤੇ ਚੁਪ ਕੀਤਿਆਂ ਹੋਇਆਂ ਭੀ ਉਹ ਸੋਭਾ ਦਿੰਦੀ ਹੈ, ਕਿਉਂਕਿ ਉਸ ਦਾ ਮਨ ਮੁਸਕਰਾ ਰਿਹਾ ਹੁੰਦਾ ਹੈ।
ਜਿਵੇਂ ਉਹ ਗਰਭ ਦੇ ਪੂਰਨ ਹੋਇਆਂ ਬਾਲ ਨੂੰ ਜਨਮ ਦੇਣ ਵੇਲੇ ਆਪ ਰੋਂਦੀ ਹੈ, ਪਰ ਘਰ ਦੀਆਂ ਵੱਡੀਆਂ ਵਡੇਰੀਆਂ ਪ੍ਰਸੰਨ ਹੁੰਦੀਆਂ ਤੇ ਉਸ ਨੂੰ ਪਿਆਰਦੀਆਂ ਹਨ ਭਾਵ ਰੋਂਦੀ ਭੀ ਉਨ੍ਹਾਂ ਨੂੰ ਪਿਆਰੀ ਲਗਦੀ ਹੈ।
ਜਿਵੇਂ ਮਾਨ ਮੱਤੀ ਮਾਨ ਛੱਡ ਕੇ ਨਿਰਮਾਣ ਹੁੰਦੀ ਹੈ ਤਾਂ ਪਤੀ ਦਾ ਪ੍ਰੇਮ ਰਸ ਪਾ ਕੇ ਚੁੱਪ, ਪਰ ਤਨੋਂ ਮਨੋਂ ਆਨੰਦ ਵਿਚ ਹੁੰਦੀ ਹੈ।
ਤਿਵੇਂ ਉਹ ਗੁਰਮੁਖ ਜਿਨ੍ਹਾਂ ਦੇ ਅੰਦਰ ਪ੍ਰੇਮਾ ਭਗਤੀ ਦਾ ਪ੍ਰਕਾਸ਼ ਹੈ, ਭਾਵੇਂ ਉਹ ਬੋਲਦੇ ਹਨ ਜਾਂ ਬੈਰਾਗ ਕਰਦੇ ਹਨ ਜਾਂ ਚੁਪ ਕਰ ਰਹਿੰਦੇ ਹਨ, ਉਹ ਸਭਨਾਂ ਹਾਲਤਾਂ ਵਿਚ ਬਹੁਤ ਸੋਭਨੀਕ ਹੁੰਦੇ ਹਨ ॥੬੦੫॥