ਫਨੰਗ ਅਨੇਕਾਂ ਹੀ ਫਨਾਂ ਰੂਪ ਅੰਗ ਧਾਰਣ ਕਰਣ ਹਾਰੇ ਐਸੇ ਸ਼ੇਖ ਨਾਗ ਆਦਿ ਸਰਪ ਫਨ ਦੀ ਨੋਕ ਉਪਰ ਧਰਤੀ ਭਰ ਦੇ ਭਾਰ ਧਾਰਣ ਕਰਨ ਚੁੱਕਣ ਵਾਲੇ ਅਨਗਿਣਤ ਹੀ ਜਿਸ ਮਹਾਰਾਜ ਦੇ ਰਚੇ ਹੋਏ ਹਨ ਤਿਸ ਨੂੰ ਗਿਰਧਰ ਇਕ ਛੋਟਾ ਜਿਹਾ ਸਿਲਾ ਰੂਪ ਪਰਬਤ ਚੁੱਕ ਲੈਣ ਹਾਰਾ ਆਖਣ ਵਿਖੇ ਕਿਹੜੀ ਭਾਂਤ ਦੀ ਇਹ ਵਡਿਆਈ ਹੈ।
ਜਿਸ ਦਾ ਇਕ ਬੌਰਾ ਮਸਤਾਨਾ ਜੇਹਾ ਸੇਵਕ ਵਿਸ਼੍ਵਨਾਥ ਨਾਮ ਨਾਲ ਆਪਣੇ ਆਪ ਨੂੰ ਸਦਵਾ ਰਿਹਾ ਹੈ, ਤਿਸ ਨੂੰ ਬ੍ਰਿਜ ਨਾਥ ਆਖ ਦਿੱਤਿਆਂ ਕਿਹੜੀ ਵਿਸ਼ੇਸ਼ਤਾ ਹੋ ਗਈ।
ਜਿਸ ਤੇ ਓਅੰਕਾਰ ਦੇ ਅਨੇਕਾਂ ਹੀ ਆਕਾਰ ਸੂਰਤਾਂ ਸ਼ਕਲਾਂ ਦੇ ਸਰੂਪ ਪਸਾਰੇ ਹੋਏ ਹਨ ਅਰਥਾਤ ਜੋ ਆਪ ਅਨੇਕਾਂ ਬ੍ਰਹਮੰਡਾਂ ਦੇ ਰਚਨ ਹਾਰਾ ਹੈ, ਤਿਸ ਨੂੰ ਨੰਦ ਨੰਦਨ ਨੰਦ ਦਾ ਪੁਤ੍ਰ ਆਖਣ ਵਿਚ ਕੌਣ ਸੋਭਾ।
ਅੰਧ ਮੂੜ ਅਗ੍ਯਾਨੀ ਮੂਰਖ ਲੋਕ ਜਾਣ ਦੇ ਤਾਂ ਹਨ ਐਉਂ ਦੀ ਉਸਤਤੀ ਪਰ ਕਰਦੇ ਹਨ, ਇਸ ਪ੍ਰਕਾਰ ਨਿੰਦਿਆ ਐਹੋ ਜੇਹੇ ਅਰਾਧਨ ਨਾਲੋਂ ਤਾਂ ਮੋਨ ਚੁੱਪ ਹੀ ਸੁਖਦਾਈ ਸੁਖ ਦੀ ਦਾਤਾ ਭਲੀ ਹੈ ॥੫੫੬॥