ਜਿਸ ਤਰ੍ਹਾਂ ਅਕਾਸ਼ ਵਿਚ ਵਿਚਰਤਾ ਹਇਅ ਉਡਦਾ ਫਿਰਦਾ ਪੰਛੀ ਜਾਲੀ ਤਾਣ ਕੇ ਫੜ ਲਿਆਈਦਾ ਤੇ ਪਿੰਜਰੇ ਵਿਚ ਪਾ ਰਖੀਦਾ ਹੈ।
ਅਥਵਾ ਜੈਸੇ ਗਹਿਬਰ ਬਨ ਘਨੇ ਜੰਗਲ ਅੰਦਰ ਹਾਥੀਆਂ ਦਾ ਮਦਮੱਤ ਸ੍ਰਦਾਰ ਹਾਥੀ ਮਹਾਵਤ ਦੇ ਅੰਕੁਸ਼ ਕੁੰਡੇ ਨੂੰ ਮੰਨ ਕੇ ਪ੍ਰਵਾਣ ਕਰ ਕੇ ਓਸ ਦੇ ਅਧੀਨ ਹੋ ਜਾਂਦਾ ਹੈ।
ਇਸੀ ਪ੍ਰਕਾਰ ਜੈਸੇ ਬਿਖਿਆਧਰ ਸਰਪ ਬਿਖਮ ਦੁਰਗਮ ਬਿਖੜੀ ਵਿੰਗ ਤੜਿੰਗੀ ਬਿੱਲ ਖੁੱਡ ਵਿਖੇ ਕਿਤੇ ਪਾਤਾਲ ਅੰਦਰ ਬੈਠਾ ਹੋਇਆ ਹੁੰਦਾ ਹੈ। ਤਿਸ ਨੂੰ ਸਪੇਲਾ ਸੱਪ ਫੜਨ ਵਾਲਾ ਬੰਗਾਲੀ ਬੀਨ ਦ੍ਵਾਰੇ ਮੰਤ੍ਰਾਂ ਦੀ ਕਾਨ ਸਗੁੰਧ ਪਾ ਪਾ ਕੇ ਫੜ ਲੈਂਦਾ ਹੈ।
ਇਸੀ ਪ੍ਰਕਾਰ ਤਿੰਨਾਂ ਭੁਵਨਾਂ ਪ੍ਰ੍ਯੰਤ ਭਟਕਦਾ ਹੋਇਆ ਚੰਚਲ ਚਿੱਤ ਸਤਿਗੁਰਾਂ ਦੇ ਗਿਆਨ ਉਪਦੇਸ਼ ਨੂੰ ਸੁਣਨ ਸਾਰ ਅੱਚਲ ਇਕਾਗ੍ਰ ਹੋ ਜਾਇਆ ਕਰਦਾ ਹੈ ਤਾਤੇ ਮਨੁੱਖ ਬਹੁਤ ਸ਼ੀਘਰ ਗੁਰਮੁਖਤਾ ਧਾਰਣ ਕਰੇ ॥੨੩੧॥