ਬੰਝ ਬਨ ਵੰਝਾਂ ਵਾਂਸਾਂ ਦਾ ਜੰਗਲ ਜੋ ਦੂਰੋਂ ਉੱਚਾ ਦਿੱਸਨ ਵਾਲਾ ਤੇ ਨੇੜੇ ਆਯਾਂ ਗੰਢੀਲਾ ਅਤੇ ਚਿਕਨਾਹਟ ਮਾਰਿਆ ਹੁੰਦਾ ਹੈ, ਓਸੇ ਸਮਾਨ ਹੀ ਬਾਹਰੋਂ ਮੈਂ ਮੇਰੀ ਵਿਚ ਵਰਤਨਹਾਰਾ ਤੇ ਅੰਦਰੋਂ ਮਾਨ ਮੱਤੀ ਦਸ਼ਾ ਦਾ ਗ੍ਰਸਿਆ ਹੋਯਾ ਇਹ ਹਉਮੈ ਤੇ ਅਭਿਮਾਨ ਦਾ ਟਿਕਾਨਾ ਜੋ ਸੰਸਾਰ ਹੈ ਸੁਗੰਧੀਓਂ ਸੂੰਨ ਜਾਣ ਇਸ ਨੂੰ ਤ੍ਯਾਗ ਕੇ ਸਾਧ ਸੰਗਤਿ ਵਿਚ ਆਏ ਪੁਰਖ ਦਾ ਮਨ ਰੂਪੀ ਭੌਰਾ ਸਤਿਗੁਰਾਂ ਦੇ ਚਰਨ ਕਮਲਾਂ ਰੂਪ ਡੱਬੇ ਵਿਚ ਸਮਾ ਜਾਂਦਾ ਮਗਨ ਹੋ ਜਾਂਦਾ ਹੈ।
ਚਰਣ ਕਮਲਾਂ ਵਿਚ ਪਰਚਦੇ ਸਾਰ ਅਤ੍ਯੰਤ ਕਰ ਕੇ ਉਪਮਾ ਤੋਂ ਰਹਿਤ ਰੂਪ ਪ੍ਰਕਾਸ਼ ਨੂੰ ਹੇਰਤ ਤੱਕਦਿਆਂ ਦ੍ਰਿਗ ਨੇਤ੍ਰ ਭੀ ਹਿਰਾਨੇ ਥਕਿਤ ਹੋ ਜਾਂਦੇ ਮਗਨਤਾ ਨਾਲ ਗੁੱਟ ਬਣ ਜਾਂਦੇ ਹਨ ਅਰੁ ਅਨਹਦ ਧੁਨੀ ਦੀ ਗੂੰਜ ਨਾਲ ਕੰਨ ਹੋਰਨਾਂ ਸ਼ਬਦਾਂ ਦੇ ਸੁਨਣ ਵੱਲੋਂ ਸ਼ਤ ਹੋਏ ਰਹਿੰਦੇ ਹਨ।
ਚਰਣ ਕਮਲਾਂ ਦੀ ਧੂਲੀ ਰੂਪ ਮਕਰੰਦ ਰਸ ਜੋ ਅਤ੍ਯੰਤ ਹੀ ਮਧੁ ਮਿੱਠਾ ਹੈ ਪਾਨ ਕਰਨ ਛਕਨ ਸਾਰ ਰਸਨਾ ਬਿਸਮ ਰਸਾਂ ਵੱਲ ਭਟਕਨੋਂ ਵਿਸਮਤਾ ਵਿਖਮਤਾਂ ਨੂੰ ਧਾਰ ਲੈਂਦੀ ਹੈ ਅਸਚਰਜ ਹੋ ਰਹਿੰਦੀ ਹੈ ਅਤੇ ਐਸਾ ਹੀ ਉਕਤ ਧੂਲੀ ਦੀ ਸੁਗੰਧੀ ਦੀ ਮਹਕ ਲਪਟ ਔਂਦੇ ਸਾਰ ਨਾਸਾਂ ਚਕਿਤ ਹੈਰਾਨ ਹੋਈਆਂ ਰਹਿੰਦੀਆਂ ਹਨ, ਭਾਵ ਗੁਰਮੁਖ ਦਾ ਦਿਮਾਗ ਭੀ ਮਸਤੀ ਨਾਲ ਖੀਵਾ ਰਹਿੰਦਾ ਹੈ।
ਇਥੇ ਪ੍ਰਕਾਰ ਚਰਣ ਕਮਲਾਂ ਦੀ ਕੋਮਲਤਾ ਨੂੰ ਅਨੁਭਵ ਕਰਦਿਆਂ ਸਾਰ ਗੁਰਮੁਖ ਦੇ ਮਨ ਰੂਪੀ ਮਧੁਕਰ ਭੌਰੇ ਦੇ ਸੀਤਲਤਾ ਸ਼ਾਂਤੀ ਨੂੰ ਪ੍ਰਾਪਤ ਹੋ ਸਰਬੰਗ ਸਭੇ ਹੀ ਸਮੂਲਚੀ ਤਰਾਂਅੰਗ ਪੰਗ ਪਿੰਗਲੇ ਹੋ ਜਾਂਦੇ ਹਨ ਜਿਸ ਕਰ ਕੇ ਪੁਨਿ ਫੇਰ ਇਹ ਅਨਤ ਹੋਰ ਹੋਰਨਾਂ ਰਸਾਂ ਕਸਾਂ ਆਦਿ ਵਾ ਸੰਸਾਰੀ ਪ੍ਰਵਿਰਤੀਆਂ ਵੱਲ ਨਹੀਂ ਧੌਂਦਾ ਭਟਕਦਾ ਹੈ ॥੩੩੫॥